Samsung ја претстави новата генерација од нивната серија од пониската класа телефони, Galaxy A04. За разлика од порано, овие телефони функционираат одлично, а имаат и по некоја понапредна карактеристика, па не е чудо што одреден процент од корисниците сметаат дека нема потреба од купување на било што поскапо.
Galaxy A04 е наследник на ланскиот Galaxy A03 и иако промените не се драстични, тој сепак донесува одредени подобрувања.
Екранот му е со големина од 6,5 инчи и има резолуција од 1600 на 720 пиксели, со што се добива нивна густина од 270 пиксели на инч. Технологијата во која е направен екранот очекувано е PLS LCD, а на горната страна камерата е поставена во таканаречениот „солза“ исечок.
Телефонот работи на осум јадрен процесор, но не е точно познато кој. Доаѓа со избор од 32, 64 и 128GB простор за податоци, како и 4, 6 и 8GB RAM. Работи на One UI 4.1 кој е направен на основа на Android 12 и има батерија со капацитет од одлични 5000 mAh.
На задната страна, поставени без посебни модули, се две камери со 50 мегапиксели со f/1.8 и уште една камера за проценка на длабочината од 2 мегапиксели. Селфи камерата е со 5 мегапиксели и f/2.2.
Достапноста на Galaxy A04 и цената уште не се достапни, а се очекува дека ќе ја задржи ланската цена на претходникот од околу 9.000 денари.
