Apple можеби „почека“ додека се реши да стави OLED екран кај iPad Pro уредите, но затоа кога тоа го направи, го направи во нивниот препознатлив стил. iPad Pro со М4 не дојде со обичен OLED екран, па истиот е направен со два OLED слоја и е наречен Tandem OLED.
Ваквиот екран овозможува доста посилна светлина, нешто што е слабост на OLED екраните, а со тоа и поистакнати бои. Оваа предност се добива заедно со помала потрошувачка на енергија.
Според извори од The Elec, Apple размислува оваа технологија да ја донесе и кај iPhone, со што телефонот би добил уште подобар екран од сегашниот.
Наводно од компанијата за технологијата имаат разговарано со LG, кои се повеќе познати кога е во прашање Tandem OLED, но разговори имало и со Samsung.
Како и да е, според информациите, доколку Apple се решат за вакво нешто, најрано што би можеле да го очекуваме е во 2028 година, што значи има време до тогаш и може да има доста промени во меѓувреме.
iPhone изгледа не би ја добил баш истата технологија од iPad Pro, па Tandem OLED екранот би бил направен во поедноставена верзија која нема да ги дуплира сите пиксели, односно вториот слој би бил само за сината боја. Ова ќе ги донесе дел од предностите на технологијата, но со помала цена.
