Google денеска го претстави Project Tango, 5 инчен мобилен телефон кој што работи на Android оперативниот систем. Меѓутоа ова не е уште еден мобилен телефон наменет за крајните корисници или наследник на Nexus серијата. Project Tango е телефон кој што содржи посебен хардвер и софтвер наменет да го следи целосното 3D движење на уредот, додека во исто време креира мапа од околината. Сензорите вградени во телефонот му овозможуваат да направи повеќе од 250.000 3D мерења во секунда, ажурирајќи ја позицијата и ориентацијата во вистинско време. Потоа податоците се комбинирани во еден краен 3D модел од просторот околу корисникот.
Поточно се работи за уред кој што треба да креира пореална 3D слика од околината која што се мапира од досега достапните и користени уреди и софтверски решенија. Ова е корисно за развојот на навигација во затворени простории, нов тип на игри, како и нови апликации кои што од Google се надеваат дека ќе произлезат од оваа технологија.
Од Google прашуваат, што ако би можеле да ги измерите димензиите од вашиот дом, едноставно движејќи се наоколу со телефонот пред да одите да купувате мебел? Што ако насоките не престануваат на адресата од улицата до која што одите? Што ако никогаш повеќе не се изгубите во нова зграда? Ова се само неколку од можните примени на технологијата, односно апликациите што би произлегле со нејзината примена.
Project Tango е развиван од страна на сектор од Google за Напредна технологија и проекти (Advanced Technology and Projects – ATAP). Главен на секторот e поранешен вработен во тимот на Kinect во Microsoft, Johnny Lee. Проектот е сеуште во развојна тест фаза, па само 200 избрани програмери ќе добијат примерок, а услов за тоа ќе биде претставување на идеа како би го користеле телефонот и што би сакале да постигнат.
Извор: Google ATAP
