Телефоните на Samsung, поточно тие од највисоката класа, веќе одреден период имаат одлична можност, а тоа е да се поврзат на поголем екран и да се користат како десктоп компјутер. Samsun DeX се вика функцијата, а истата овозможува и прилагоден кориснички интерфејс погоден за поголем екран.
Со процесирачката моќ на денешните мобилни телефони, за некои луѓе тоа е се што е потребно за да можат да ја завршат својата работа и да сурфаат на интернет. Ова посебно важи кога се оди на пат, па не е потребно и погодно да се носи лаптоп компјутерот, иако и тие во денешно време се доста лесни и тенки.
Според неофицијални информации, Samsung, но и LG, работат на развој на мали надворешни и преносни екрани за мобилните уреди. Тие би требало да бидат со околу 14 инчи големина, а според информации Samsung има и име за овој екран, Samsung Dexbook.
Со екранот би дошла и батерија со што поврзувањето со мобилните може да се направи било каде, без потреба од извор на енергија.
Може да се каже дека ова е тоа што им фалеше на мобилните со ваква можност, па лесно може да се замисли како патувањето и носењето на ваков уред би било многу попрактично од носење дури и на мал лаптоп.
Скоро се што ни треба во денешно време го чуваме на нашите мобилни или во облакот, а со достапноста на мобилните апликации, доста работи може да се завршат само преку мобилниот. Додавањето на еден надворешен екран ќе ја олесни и надополни работата со мобилните.
