Минатата недела извори блиски до ZDNet порталот информираа дека првата Preview верзија за програмерите од Windows 9 може да се очекува до крајот на Септември или почетокот на Октомври. Денес нови информации доаѓаат од извори на порталот The Verge според кои што Microsoft ќе одржи посебен настан за новинарите на кој што ќе биде претставена новата верзија од оперативниот систем. Настанот треба да се одржи на 30-ти Септември, иако може да дојде до промена на датата. Без разлика дали настанот ќе биде одржан или не според информациите на изворите, тест верзијата за програмерите треба да биде достапна на таа дата или неколку дена после тоа.
Со оглед дека овие информации доаѓаат од два портали кои што важат како сериозни во својата област, може да се каже дека шансите за претставување на Windows 9 оваа есен се големи.
Повеќето од вас се веќе запознаени со тоа што може да се очекува од Windows 9, односно некој од функциите се официјално најавени, а доста од нив се дел од шпекулации. На кратко да ве потсетиме, Windows 9 треба да го вклучува новото Start мени на кое што ќе бидат поставени и „живите“ плочки, Charms лентата ќе биде тргната, а работите од неа распределени кај апликациите, модерните апликации ќе можат да работат во десктоп околина во посебни прозори, а ќе бидат и воведени виртуелни десктоп околини, нешто што е популарно и го има веќе одамна на OS X и разните Linux дистрибуции.
Исто така се најавува и достапност на Cortana како посебна апликација, меѓутоа не е познато дали ќе може да се користи од страна на сите корисници или од тие каде што е достапна на Windows Phone. Можни се и одредени промени на десктоп околината кои што треба да го подобрат корисничкото искуство, а се најавуваат и минимални промени на корисничкиот интерфејс.
Извор: The Verge
