Чоколадо… освен мал број на чудни луѓе кои немаат афинитет кон овој чудесен производ на човештвото, ние останатите секако дека цениме добро парче чоколадо. Тоа често оди во интересни комбинации, како со лешник, бисквити, ванила, путер од кикирики, торта…
Како што знаете, јадење премногу чоколадо може негативно да влијае врз формата на телото и на инсулинските нивоа. Тоа е поради големата количина на јаглехидрати кои производителите ги вклучуваат во стандардните „млечни“ чоколади. Затоа и се препорачува јадење на темно чоколадо со процент на какао над 50%. Самото какао во себе содржи соединенија наречени полифеноли кои имаат противоксидативно и противвоспалително дејство во телото и се добри за нас.
За жал стандардниот начин на подготвување на какао зрната за понатамошна обработка предизвикува уништување на дел од полифенолите кои се наоѓаат природно во овие јаткасти плодови. На пронаоѓање подобар начин на обработка на какаовите зрна се ангажирале научниците од Универзитетот од Гана кои испитувале промени на процесот на производство.
Во стандардниот процес на производство, какаовите зрна се сместуваат во кошници кои се обложени со кори од банана каде што ферментираат неколку дена. Потоа се сушат на сонце и се печат. Научниците од Универзитетот внеле уште една точка во процесот кој го зголемил процентот на зачувување на противоксидативните состојки. Имено, тие ги зачувале какаовите лушпи и не ги ваделе семките неколку дена, при што забележале дека најдобар резултат има кога истите се чуваат 7 дена.
Понатаму, во фазата на печење, место да ги печат на стандардните 120-130 степени за 10-20 минути, тие ги печеле на пониска температура за 45 минути. Овие два чекори предизвикале да остане значително поголема количина на полифеноли и противоксиданти во зрната. Дополнително, тие предизвикале самите зрна да бидат послатки, што го подобрило вкусот на истите.
Научниците успеаа да ни го подобрат и чоколадото. Би сакале да им порачаме дека постојат и уште многу други производи како јајца, стекови, пица, леќа и слично на кои не би им штетело да им се подобри вкусот и квалитетот, ако е можно.
Извор: IFScience, Health Line, PopSci
