На меѓународниот саем на автомобили кој што ќе се одржи оваа недела во Женева, Ferrari, Mercedes-Benz и Volvo ќе претстават модели во кои што е интегриран новиот CarPlay систем од Apple. CarPlay е систем составен од екран на допир како контролна табла во автомобилот, кој што работи преку поврзување на iPhone мобилен телефон преку Lightning портата. Доаѓа како надградба на iOS 7 и поради потребата за Lightning порта, работи само со поновите модели, односно со iPhone 5, 5s и 5c. Покрај овие три производители, од Apple најавуваат приклучување на повеќето останати како, BMW Group, Ford, General Motors, Honda, Hyundai Motor Company, Jaguar Land Rover, Kia Motors, Mitsubishi Motors, Nissan Motor Company, PSA Peugeot Citroën, Subaru, Suzuki и Toyota Motor Corp.
CarPay доаѓа со кориснички интерфејс на кој што ги има познатите iOS икони, меѓутоа прилагоден за овозможување на едноставно користење во автомобилите, односно за време на возење. Корисничкиот интерфејс е чист и ги прикажува само потребните работи со цел возење без непотребно привлекување на вниманието, како и потребата од читање и пребарување на достапните команди. Со CarPlay корисниците можат да добиваат насоки, да примаат и прават повици, да примаат и праќаат пораки и да слушаат музика.
Системот повеќето работи може да ги врши преку Siri, што значи дека за повиците или пораките не е потребно гледање кон екранот при возење, односно активностите корисникот може да ги прави преку гласовни команди. Siri добиените пораки ги чита, а одговорите на пораките корисникот може да ги диктира со што неговото внимание цело време ќе остане на патот.
Исто така Siri може да прави предвидување на наредната дестинација преку добиените пораки, претходните возења, контактите и закажаните состаноци. Без разлика дали наредната дестинација е предложена од Siri или корисникот сам ја побарал, системот овозможува гласовна навигација со информации за сообраќајот, времето до дестинацијата и слично.
CarPlay исто така може да се користи за слушање на музика, па во него покрај слушањето на музиката од телефонот, поддржани се и iTunes Radio, како и Spotify и iHeartRadio.
Покрај преку екранот на допир и гласовните команди, системот може да се контролира и преку копчињата со кои што доаѓа моделот на автомобилот, како и вграденото копче за активирање на Siri поставено на воланот.
