Samsung веќе ја продава втората генерација од своите паметни часовници. Првиот часовник, Galaxy Gear, беше претставен минатата година и работи на прилагодена верзија од Android оперативниот систем. Оваа година Samsung претстави три нови модели кој што овој пат работат на нивниот Tizen оперативен систем развиван во соработка со Intel, покрај другите компании. Новите модели се Gear 2 и Gear 2 Neo, како и часовникот наменет за фитнес корисниците Gear Fit.
Карактеристично за овие паметни часовници, како и за тие од повеќето производители, е потребата од поврзување со паметен телефон со цел да може да ги извршуваат повеќето нивни функции. Па така, преку часовниците може да се прават повици, да се следат нотификации, да се контролира музиката, покрај неколку функции кои што се независни. Според The Wall Street Journal, Samsung ќе претстави нов паметен часовник во наредните месеци кој што ќе работи целосно независно од паметните телефони. Тоа значи дека тој ќе вклучува SIM картичка, а со тоа и можност за правење на повици, поврзување на интернет и слични карактеристики претходно можни само преку поврзувањето со телефон. Според информациите и овој часовник ќе работи на Tizen оперативниот систем, односно изгледа Samsung веќе нема да го користи Android кај овој тип на производи и покрај посебно направената верзија од страна на Google, наречена Android Wear.
Информацијата не е официјално потврдена од страна на Samsung и доаѓа од извори на WSJ весникот, па поради тоа останува да почекаме, да ги следиме останатите вести и да видиме што ќе ни донесат месеците што претстојат.
Извор: The Verge, The Wall Street Journal