Во обид пред европските судови да биде променета одлуката од 2018 година кога компанијата беше казнета со рекордни 4,34 милијарди евра, Google аргументира дека нивниот пребарувач е изборот на корисниците, односно тие не се насочени или натерани да мораат да го користат.
Како пример за тоа колку нивниот пребарувач е популарен и корисниците избираат да го користат, од Google ја даваат информацијата дека најчесто пребаруваниот термин на конкурентниот пребарувач Bing од Microsoft е „google“.
Секако, ова не можеме да знаеме дали е навистина точно, а не веруваме дека од Microsoft би ја објавиле оваа информација.
„Ние поднесовме докази кои покажуваат дека најчесто пребаруван термин на Bing е Google.“ – истакна Алфонсо Ламадрид кој е адвокат на Alphabet компанијата пред суд на ЕУ во Луксембург.
Во основа Google сака да докаже дека огромната казна која им е изречена од страна на ЕУ е неоснована и дека тие не прават одредени активности со кои ги тераат корисниците да мораат да го користат Google пребарувачот, меѓу другото. Корисниците самите го бираат Google затоа што е најдобар и најпопуларен.
Ова тврдење може да се каже дека е делумно точно, односно дека корисниците најчесто се одлучуваат да го користат Google, но може да се дискутира дали и какви активности имаат преземено од компанијата за да тоа биде случајот.
