The Sims е една од најпознатите игри претставена во 2000 година која што доби продолжение 4 години подоцна. Доколку не сте запознаени, оваа игра вклучува симулација на животот на карактерите која што ви овозможува контролирање на секој аспект од нивниот живот. Можете да го уредувате нивниот дом, да готвите, да излегувате навечер, да одите на работа и многу повеќе.
The Sims 2 која што беше претставена во 2004 година престана да добива поддршка минатата недела, па од EA Games решија да ви ја дадат бесплатно. Играта е стара, а од тогаш се излезени уште две нови верзии, меѓутоа за љубителите на неа ова сигурно ќе биде интересна можност повторно да ја играат.
Симнувањето на играта и нејзината инсталација се прави преку Origin, сервис од EA Games за дигитална дистрибуција на игри, порано наречен EA Download Manager. Доколку веќе не го користите овој сервис, потребно е прво да креирате корисничка сметка и да го симнете десктоп клиентот. Кога ќе го вклучите Origin потребно е преку главното мени да го внесете кодот I-LOVE-THE-SIMS во делот Redeem Product Code.
Бесплатната игра која што можете да ја симнете, покрај основната игра ги вклучува и пакетите за проширување (expansion packs) како дел од Ultimate Collection. Па така, ќе ги добиете и University, Nightlife, Open for Business, Pets, Seasons, Bon Voyage, FreeTime и Apartment Life додатоците.
Можноста за симнување на играта бесплатно завршува на 31 Јули 2014, што значи дека ви остануваат нешто помалку од недела дена.
