Google во соработка со VMware ќе овозможи корисниците на нивниот веб базиран оперативен систем Chrome OS да се поврзат на Windows десктоп или да користат Windows апликации преку нивните cloud сервиси. Ова ќе биде овозможено преку VMware Horizon DaaS платформата. Daas е кратенка за Desktop as a service, односно десктоп како сервис, платформа која што овозможува корисниците да се поврзат на нивните апликации преку веб. Апликациите може да бидат компаниски софтвер кој што работи само на Windows или познатите Office програми како Word или Excel.
Корисниците на Chrome OS веќе имаат можност да се поврзат на Windows оперативниот систем преку Chrome Remote Desktop, како и да користат Windows апликации преку Citrix Receiver додатоците за Chrome. Овие додатоци сепак бараат да се поврзете на оперативен систем на некој друг компаниски компјутер. Новото решение на кое што работат Google и VMware ќе биде погодно за компаниите кои што не сакаат да развиваат посебна компаниска инфраструктура, туку да ги користат сервисите преку cloud провајдерите. Користејќи ја VMware Horizon платформата корисниците се во можност да се поврзат на Windows десктоп преку VMware’s Virtual Desktop Infrastructure (VDI), како и да вршат стриминг на Windows апликации преку Remote Desktop Services (RDS).
Според Google со користење на вакви решенија компаниите ќе може да заштедат повеќе од 5000 долари по компјутер поради тоа што нема да имаат потреба да купуваат поскап хардвер, како и да плаќаат лиценци за Windows за секој вработен. Google со овој потег сакаат да ги привлечат корисниците кои што ќе мораат да ги надградат своите системи во Април оваа година кога Microsoft ќе ја прекине поддршката за Windows XP.
