Со одговор на објава на X, Елон Маск потврди дека оваа мрежа ќе направи доста голема промена кај можноста за блокирање на сметките од страна на корисниците.
За разлика од досега, кога се блокира некоја сметка, односно некој корисник, тој корисник веќе не може да ги гледа објавите од корисникот, а се што може да види е дека е блокиран, па ги нема дури ни бројот на следбеници и слично.
Со новата промена, корисниците кои се блокирани сега ќе можат да ги гледаат објавите од таа сметка, односно објавите кои се јавни, што значи корисникот мора да има јавен профил.
Тие нема да можат да имаат интеракција со објавите, односно нема да можат да ги „лајкуваат“, да коментираат и да ги споделуваат, но затоа сега ќе можат да ги гледаат.
Маск претходно имаше најавувано дека планира да го тргне копчето за блокирање целосно, а морам да се сложам со него. Корисниците се блокираат помеѓу себе за најосновни работи, односно за мала разлика во ставови, па намената на оваа можност веќе нема врска со заштитата на корисниците.
Можноста да не може да се добиваат пораки, како и коментари е доволна за заштита на корисниците, па класичното блокирање можеби е добро што ќе биде променето.
