Европската Комисија минатата недела поднесе предлог за забрана на продажба на нови автомобили кои работат на фосилни горива, односно автомобили кои работат на бензин и дизел, почнувајќи од 2035 година. Целта на овој предлог е да се намали емисијата на штетни за климата гасови, а проценките се дека автомобилите придонесуваат за 12% од вкупната емисија на јаглерод диоксид.
Од Комисијата дополнително предлагаат да до 2030 намалувањето на штетните гасови биде за 50%, по што би се стигнало до целта од 100% намалување во 2035 година.
Европската Комисија исто така додава дека треба да бидат инсталирани повеќе милиони полначи за автомобилите, кои до 2050 би стигнале до бројката од 16,3 милиони. Ова се смета како начин за мотивација за поголема продажба на електричните автомобили кои сега дефинитивно трпат поради слабата мрежа на полначи.
Идејата е да се донесе закон според кој полначите за автомобилите ќе мора да ги има на не повеќе од 60 километри растојание.
Овој предлог секако сега ќе мора да помине долг процес на дискусија во Европскиот Парламент, како и помеѓу земјите членки, па се очекува дека законот, доколку биде донесен, ќе биде донесен за неколку години.
Иако одредени производители на автомобили веќе најавија слични планови за целосно префрлување на производството на електрични автомобили, сепак се очекува дека за одредени производители ова ќе претставува проблем. Во ЕУ се наоѓаат поголемиот број на автомобилски производители, затоа се очекува овој предлог да помине сложено како и доста други специфични предлози.
