NPE Team, односно new product experimentation делот од Facebook, претстави нова апликација наречена Sparked. Оваа апликација е замислена како еден вид на брзи видео „дејтови“, но со акцент на луѓе кои се љубезни.
Апликацијата, како што може да се претпостави од секторот кој ја има развиено, е експериментална и прашање е воопшто дали од Facebook ќе се решат да го дадат вниманието на целата компанија.
Идејата за Sparked е да корисниците имаат по четири минути да разговараат помеѓу себе на видео повик, без пораки, лајкови и слично. После тие четири минути, разговорот се прави со нова личност, односно нешто слично како познатиот speed dating во живо.
Доколку некои луѓе си се допаднат, можат повторно да разговараат, овој пат со ограничување од десет минути, по што можат да разменат контакти и слично за да ја продолжат интеракцијата понатаму.
Facebook веќе има „дејтинг“ апликација, односно сервис кој е дел од мрежата, Facebook Dating, но уште не е достапен во целиот свет. Сигурно мали се шансите Sparked да стане достапна претходно.
