TikTok стана првата апликација која не е од Facebook и не е игра, која е симната повеќе од 3 милијарди пати на продавниците за апликациите на двете мобилните платформи. Оваа информација доаѓа од компанијата Sensor Tower од каде истакнуваат дека во бројките влегуваат симнувањата од Play Store и App Store, кинеската верзија Douyin, без прединсталирани апликации и неофицијални продавници.
Според бројките од Sensor Tower, TikTok е најмногу симнувана апликација која не е игра во првата половина од 2021 со 383 милиони први симнувања. Апликацијата исто така има направено скоро 1 милијарда долари од корисниците.
Овој успех на TikTok доаѓа и покрај проблемите кои ги имаше минатата година со администрацијата на Доналд Трамп, како и тргањето на апликацијата од Индија. Поради тргањето од Индија бројот на нови инсталации во споредба со минатата година е намален, но тоа сепак не ја спречи апликацијата да го достигне успехот.
Досега единствените апликации кои ја имаат поминато бројката од 3 милијарди симнувања беа Facebook, Messenger, Instagram и WhatsApp.
TikTok исто така ги стигна и апликациите како Tiner, Netflix, YouTube и слично, во потрошувачката од корисниците која ја помина сумата од 2,5 милијарди долари.