Можеби еден од најголемите проблеми со кои што се соочува Microsoft е мотивација на корисниците да ги користат најновите верзии од некои од производите. Ова посебно стана проблем од претставувањето на Windows 8 или како што некои го нарекуваат втор Windows Vista, поради малата популарност кај корисниците. Поради тоа поголемиот дел од нив решија да останат на Windows 7, како и на некоја од постарите верзии од оперативниот систем.
Сличен проблем се јавува и кај верзиите на Internet Explorer кои што се користат. Во овој случај не се работи за поголема популарност на постарите верзии, туку во типот на корисници на овој интернет прелистувач. Најчесто корисници на IE се компаниите кои што мораат да го користат поради одредени веб апликации, како и корисници кои што не се разбираат многу во компјутерите, па го користат прелистувачот кој што им доаѓа со оперативниот систем, што во случајот со Windows е Internet Explorer.
Кога ќе се земе фактот дека повеќето корисници не ја користат најновата верзија од Windows, бројката е распоредена низ повеќе верзии, вклучувајќи ја и XP верзија за која што поддршката заврши во Април оваа година. Ова значи дека сите корисници на Windows користат различни верзии и од Internet Explorer. Од Microsoft се обидуваат на разни начини да ги мотивираат корисниците да почнат да ги користат најновите верзии од софтверските решение кои што се достапни, меѓутоа искуството покажува дека тоа не им оди баш најлесно.
Денес од компанијата информираа дека во наредните година и пол планираат да ја прекинат поддршката за постарите верзии од Internet Explorer. Тоа значи дека поддршка ќе има онаа верзија од прелистувачот која што е најнова за соодветниот оперативен систем. Најстарата верзија од IE која што ќе има поддршка ќе биде 9-тата, која што ќе може да се користи само на Windows Vista SP 2 и Windows Server 2008 SP2. Корисниците на Windows 7, 8, 8.1 ќе мора да ја инсталираат 11-тата верзија од интернет прелистувачот.
Поддршката за верзиите на Internet Explorer постари од 9-тата истекува на 12-ти Јануари 2016 година, по што тие верзии веќе нема да добиваат технички и сигурносни надградби. Во продолжение можете да ја погледнете листата на верзии на кои што ќе биде достапен IE по наведената дата:
Верзија на Windows | Верзија на Internet Explorer |
---|---|
Windows Vista SP2 | Internet Explorer 9 |
Windows Server 2008 SP2 | Internet Explorer 9 |
Windows 7 SP1 | Internet Explorer 11 |
Windows Server 2008 R2 SP1 | Internet Explorer 11 |
Windows 8.1 | Internet Explorer 11 |
Windows Server 2012 | Internet Explorer 10 |
Windows Server 2012 R2 | Internet Explorer 11 |