Истражувачи од Пекинг Универзитетот работат на мали ознаки (tags) кои што се поставуваат на амбалажата од храната и преку менување на бојата покажуваат дали таа е сеуште свежа и погодна за консумирање или е расипана. Ознаките се со големина на зрно од пченка, како што го споредуваат развивачите, и се направени од смеса слична на гел во која што се поставени нано прачки. Исто така можно е нивно поставување на кутиите и шишенца од лекови и истите да ја дадат информацијата за нивната активност, односно можност за консумирање.
Изработката на овие ознаки е многу едноставна и евтина, нагласуваат од универзитетот, а исто така е нетоксична и безбедна за поставување на различни места. Промената на бојата на гел смесата покажува дали производот е во ред, односно црвената боја и црвено портокаловата означуваат дека производот е погоден за консумирање, додека портокаловата, жолта, а најмногу до зелена означува дека производот е расипан. Од универзитетот нагласуваат дека иако повеќето производи имаат рок на траење назначен на нив, често се случува производите да не се чувани во препорачаните услови. Така, можно е некој производ да биде оставен на потопла температура од дозволеното, па иако рокот не е изминат, производот да се расипе. Ознаките ја имаат можноста да се прилагодат на ваквите варијации на условите и точно да ја покажат состојбата на производот.
Во продолжение можете да го погледнете краткото видео каде што е објаснета работата на овие паметни ознаки.
