Microsoft HoloLens е едно од највозбудливите парчиња технологија изминативе две години, но уредот е недостапен за поголемиот број на купувачи. Сепак, неговите холограмски можности наскоро ќе станат дел од секој нов Windows 10 компјутер, како лаптопите и десктопите, но дури и за малите NUC компјутери на Intel.
Се уште не сум сигурен дека Windows Holographic ќе можете да го користите и на вашиот Windows 10 компјутер или лаптоп, но верувам дека за што поширок број на корисници на платформата, Microsoft ќе ја направи достапна за сите компјутери со барем малку подобри перформанси.
Холограмските можности инаку ќе станат достапни со Windows Holographic Platform, која ќе стигне со надградба за сите Windows 10 корисници уште наредната година.
Со оваа платформа, лаптопите ќе можат да се користат како централа за многу други уреди за изменета и виртуелна реалност (на пример Oculus Rift и HTC Vive), кои нема да мора да имаат цел компјутер вграден во нив, како што е случајот со HoloLens. Ова ќе ја направи изменетата реалност многу подостапна за пошироката публика, бидејќи самите уреди за гледање на „холограми“ ќе бидат многу поевтини.
Изменетата реалност достапна кај сите Windows 10 компјутери ќе може да биде многу корисна за професионалните корисници, како дизајнерите, но очекувајте и дивелоперите на игри да создадат многу наслови кои ќе може да ги искористат уникатните карактеристики на таквата технологија.
Извор: Engadget, ARSTechnica, Windows Blog
