Од Европската Комисија објавија дека доделиле посебен спектар за мобилна комуникација во авионите со што се овозможува користење на одредени фреквенции за 5G комуникациската технологија.
Со оваа одлука, европските авиокомпании ќе можат да им овозможат на своите клиенти користење на нивните 5G телефони за комуникација, односно за пораки, повици и брз интернет, исто како што беше случајот со претходните генерации на мобилните технологии.
Не е дадена точна информација кога може да се очекува резултатот од овие промени, но тоа секако ќе се случи во годините што следат.
„5G ќе овозможи иновативни сервиси за луѓето и ќе ги зголеми можностите за европските компании. Небото веќе не е граница кога се во прашање можностите овозможени од супер брза, со висок капацитет поврзаност.“ – истакна Тиери Бретон, Комесар за внатрешен пазар во ЕУ.
Начинот на којшто се овозможува мобилна конекција на авионите е преку таканаречени „пико базни станици“ кои потоа комуницираат со сателити за да се воспостави поврзување со мобилните базни станици на Земјата.
Фреквенциите коишто се користат се внимателно избрани со цел да не се мешаат со фреквенциите кои се користат од страна на авионите за комуникација, навигација и слично.
