Според неофицијални информации од корејскиот ETNews, Apple работи на развој на сопствена технологија за батерии кои би можеле да ги видиме во нивните производи од 2025 година.
Оваа технологија наводно е во развој уште од 2018 година, а е започната и како потреба за се’ уште неофицијалниот Apple автомобил. Сега развојот се истакнува дека е во главно насочен кон моменталните производи, а како потреба посебно се појавува по претставувањето на Vision Pro уредот кој со надворешна батерија „издржува“ едвај 2 часа.
Според информациите, Apple работи на материјалите на катодата со што треба да има контрола над перформансите, густината на енергијата која се складира, стабилноста и слично. Тие користат целосно различен состав во споредба со сегашните батерии, користејќи никел, кобалт, манган и алуминиум.
Дополнително, се истакнува и користење на јаглеродни „наноцевки“ кои треба да ја подобрат спроведливоста на материјалите, како и зголемување на содржината на силикон на местото на графит.
Сето ова треба да овозможи зголемување на капацитетот на батериите, како и нивниот век, брзина на полнење и слично.
Со критиките кои ги добиваат од компанијата со iPhone 14 серијата, добро би било да се види претставување на целосно нова генерација од батерии кои би направиле разлика на пазарот.
Од кога ги чекаме подобрите батерии, веќе не се ни пишуваат статии за напредок на ова поле, па ќе видиме што ќе испадне и со овие од Apple.
