Zotac, еден од најпопуларните производители на гејмерски компоненти, лансира нов мини компјутер, кој има прилично моќни компоненти и Steam оперативниот систем на Valve, кој е насочен исклучиво кон гејмерите и кој има за цел да го пресели Вашиот компјутер во дневната соба.
Според тоа, NEN е пред се наменет за користење со поголем телевизор, за што Steam веќе спреми и специјален безжичен џојстик, кој ќе биде вклучен во пакувањето. Самиот дизајн на куќиштето сепак не е ништо особено, особено ако го споредиме со играчките конзоли од новата генерација, кои имаат многу помодерен изглед.
Компонентите на Zotac NEN се прилично моќни – во срцето е нов Intel Skylake чип и тоа Core i5-6400T со четири јадра, помогнат од 8 GB рам меморија, хард диск со капацитет од 1 TB и моќна, десктоп графичка картичка од Nvidia, 960GTX. Токму изборот на графичката е позитивен преседан кај овие мали компјутери – конкурентите обично доаѓаат со графички наменети за лаптопите, кои имаат генерално послаби перформанси.
NEN има и многу приклучоци – четири HDMI 2.0, две Ethernet порти, три USB 3.0 порти, две USB 2.0, еден USB Type-C, слот за SDXC картичка, влезови за микрофон и слушалки, а може и безжично да се поврзе на интернет со Wi-Fi 802.11ac и со тастатура и маус преку Bluetooth 4.0. Интересно, внатре е достапен и M.2 слот за SSD диск, доколку сакате уште поголема брзина на компјутерот при лансирањето на игрите.
Zotac се уште ги нема објавено цените за новиот NEN, но не очекувајте дека ќе биде многу евтин, особено не во споредба со играчките конзоли како Xbox One и PlayStation 4.
Извор: Liliputing
