Времето на договори помеѓу Русија и другите светски сили изгледа е барем привремено завршено. Тие во последните месеци се во еден вид економска војна, предизвикана од другите случувања кои што ни се на сите познати, па русите се повеќе се вртат кон други сојузници како Кина, на пример.
Во контекст на овие случувања, Русија сака да ја намали својата зависност од западната технологија која што моментално го држи поголемиот дел од светот. Веќе можевме да прочитаме за развојот на сопствен процесор кој што иако не е во рамките на најмодерните, ја покажува желбата за развој.
Последната иницијатива за поголема независност на Русија во технологијата е објавена од страна на рускиот министер за информации и масовни медиуми. Тој најавува дека во план е развој на посебен оперативен систем за мобилните уреди кој што треба да ги замени популарните iOS и Android.
Новиот оперативен систем се планира да биде направен на основа на Sailfish OS кој што е со целосно отворен код и е развиван од страна на Jolla, компанија од поранешни вработени во Nokia. Исто како и Android, овој оперативен систем е развиен на основа на Linux, што го прави отворен и погоден за разни промени и прилагодувања.
Планот на руската влада е да ја намали зависноста од странски технологии во наредните 10 години, од 95% на 50%.
За подобро прифаќање на новиот оперативен систем кој што треба да биде развиен, руската влада веќе е во преговори со одредени програмери да почнат да развиваат верзии од своите апликации за новиот систем.
Извор: ZDNet
