Првичните очекувања за годинешната надградба на iOS беа дека истата ќе биде повеќе насочена кон подобрување на перформансите и исправка на грешките во системот. Подоцна, истиот извор, Марк Гурман, најави дека од Apple сепак ги имаат променето плановите, па iOS 17 ќе дојде со неколку доста барани новини од страна на корисниците.
Сега член на форумот на MacRumors, кој досега се има покажано како добар извор, тврди дека ја знае едната од тие доста барани новини. Според него, контролниот центар на iPhone ќе добие поголема промена.
Не открива што тоа точно значи, односно какви ќе бидат промените, па останува само да претпоставуваме. Со оглед дека овој дел од системот не е променет со години, може да се очекува делумен редизајн, а посебно може да се очекува одредена функционална промена.
Се работи за доста едноставен дел, па не би очекувале којзнае какви новини, но можеби промена на големината и поставеноста на копчињата, а со тоа и полесно вклучување и исклучување на достапните функции.
За потсетување за тие кои не користат iPhone, контролниот центар, односно Control Center во iOS е дел од системот до кој се стига со повлекување надолу на десната страна од горниот дел од екранот. Тука се достапни копчиња за вклучување и исклучување на работи како Wi-Fi, а има и дел кој корисникот може сам да избере од листа кои копчиња да бидат достапни.
Инаку, точно што се ќе донесе iOS 17 ќе дознаеме на 5 јуни, кога е првиот и најважен дел од WWDC 2023 конференцијата за програмери од Apple.
