Моќта која ја имаат денешните смартфони, па и тие од средната класа, овозможува тие да можат да се користат и како делумна замена за компјутерите. Како би изгледало вакво нешто со години го гледаме преку Samsung DeX, функција која вклучува посебен кориснички интерфејс секогаш кога телефонот е поврзан со надворешен екран.
Иако телефоните имаат доволно моќ за правење и на посериозни активности, сепак десктоп режимот е добар за ситуации, како на пример патувања, кога се трга потребата од носење на лаптоп, па корисниците можат да ја завршат својата работа на телевизорот од хотелската соба.
Оваа функција наскоро ќе ја имаат повеќе смартфони поради тоа што истата ќе стане достапна на основната Android верзија, а има најави и дека Apple ќе донесе ваква функција кај iPhone со iOS 19.
Со бета верзиите од Android 16 го имаме првиот поглед од тоа како Google ја замислува оваа функција, а се надевам дека истата ќе биде доста подобрена од сега.
Како што би се очекувало, на долната страна достапна е лентата со апликации, додека другите информации се поставени на горна лента. Апликациите можат да се отвораат во намалени прозори и повеќе во исто време, односно класичен десктоп режим.
На почетокот од статијата можете да погледнете до каде е развојот на оваа функција од страна на Google, благодарение на видеото до Android Authority.
