Долготрајното седење е убиец. Досега сме пишувале за огромните негативни ефекти на постојаното секојдневно седење и немање на редовна нискоинтензивна физичка активност, како пешачење.
Сепак, според најновиот наод од корелациона студија, ѕенѕањето (повторливото мрдање, клатење или тресење на одреден дел од телото, како на пример, ѕенѕање на ногата горе доле) корелира со поништување на ефектите од прекумерното седење. Студијата била извршена врз 12.778 жени кои биле следени во просек од 12 години по човек, а информациите собрани биле следните: ниво на вежбање, исхрана, конзумирање на алкохол, пушење и – ѕенѕање. За жал, последното било самозапишано т.е. авторите на студијата морале да се осврнат на саморапортирање од страна на жените (во скала од 1 до 10), а не преку закачување на мерен инструмент кој би измерил колку тие ѕенѕаат во текот на денот.
Наодот бил интересен: оние жени кои пријавиле прекумерно седење и не ѕенѕале, имале значително влошување на општата ситуација со хронични заболувања и телесни проблеми. Од друга страна, тие жени кои пријавиле дека средно или интензивно ѕенѕаат во текот на денот имале значително намалување на појавата на ваквите заболувања – разлика од дури 30%! Оваа студија е корелативна, а корелација не имплицира каузација, познат статистички принцип.
Сепак, сознанието дека можеме да влијаеме врз негативните ефекти од прекумерното седење преку толку едноставна пракса како ѕенѕање ќе не` одврати од прекорување на колегата кој тоа го прави. Најверојатно неговото тело самото преку тоа му покажува дека треба да престане да седи толку пред компјутер.
ПРЕПОРАКА
Нашето тело е создадено за движење. Долготрајното седење оди директно контра ова, и затоа предизвикува едно чудо од хронични проблеми, како срцеви болести, дерегулација на срцев притисок, дебелеење, ослабување на коските, искривување на `рбетот и така натаму.
Како препорака, правете ги следниве работи секојдневно за да го анулирате негативниот ефект од долготрајното седење:
- станувајте на секој час да се истегнете и да прошетате по минимум 5 минути;
- заменете го столчето со топка за вежбање на секој час или два – ќе ве натера постојано да одржувате рамнотежа, да го држите грбот исправен и да не се заседувате во фиксна позиција;
- секој ден направете по 10.000 чекори;
- инсталирајте си лента за пешачење и стоечко биро ако имате можност. Покрај тоа што ќе ги правите тие 10.000 чекори без воопшто да приметите додека работите нешто, ќе имате редовна активност и општата телесна кондиција ќе ви биде повисока (па потоа полесно ќе можете да правите интензивен тренинг);
- во неделата имајте околу 150 минути на средно-кон-интензивно ниво на физичка активност (тренинг). Имајте предвид дека ваквиот тренинг е покрај 10-те илјади чекори дневно и не ги анулира негативните ефекти од прекумерното седење;
- јадете храна со што помало количество на јаглехидрати. Јаглехидратите го поттикнуваат лачењето на инсулин, кој пак потоа ве „клапнува“ и ве тера да го намалите движењето низ денот и да седите на столче место да се раздвижите;
Извор: IFLScience, Stanford Blog, Huffington Post
