Најпопуларниот светски производител на лаптопи, таблети и паметни телефони, конечно ја освежи својата линија на лаптопи и тоа најтенкиот MacBook Retina, кој е првиот од моделите кој ја ги добива најмоќните Skylake процесори на Intel.
Сепак, не очекувајте дека перформансите ќе бидат којзнае колку моќни – овде и натаму се вградуваат Core м чиповите, кои овозможуваат куќиштето да биде многу тенко, но се далеку од перформансите на Core “i” серијата на чипови.
Сепак, во однос на моделот пред освежувањето, има подобрување од 25% кај графиката и подобрување од 20% на перформансите на процесорот. Новиот Skylake дизајн овозможува и многу пониска потрошувачка на енергија, па така овој модел трае еден час повеќе од претходникот, односно 10 часа при сурфање и 11 часа при гледање видео преку iTunes (веројатно помалку доколку гледате преку друг софтвер).
Кај останатите компоненти нема промени – MacBook и натаму има само еден USB Type-C приклучок, кој иако се очекуваше, не го поддржува брзото Thunderbolt поврзување, како и тачпад без копчиња, но со Force Touch можности за препознавање на притисок. Цената останува иста – Core m3 моделот со 8 GB рам и 256 GB SSD диск ќе чини 1.299 долари, додека помоќниот Core m5 модел со 8 GB рам и 512 GB SSD диск чини 1.599 долари.
MacBook отсега се нуди и во нова розе – златна боја, што значи дека спектарот е сега ист како на уредите со iOS оперативен систем, односно iPhone и iPad.
