Huawei добива изгледа мало „олабавување“ на мерките со давање на дозвола да американската Qualcomm може да продава чипови на оваа компанија и покрај забраната за соработка која е на сила со повеќе дополнувања од страна на властите во САД.
Од Qualcomm имаат потврдено за Reuters дека ја имаат добиено дозволата за соработка, но и дека таа се однесува на одредени 4G производи поврзани со мобилните. Со други зборови, Qualcomm ќе може да ги продава своите нешто постари 4G чипови на Huawei, а според информациите и Intel има добиено исто така дозвола за соработка со оваа компанија.
Huawei сепак повеќе функционира со нивните Kirin чипови, но и тие се „загрозени“ од забраните поради тоа што за нивната изработка се користат дизајните од ARM, како и процесот на производство кој исто така доаѓа од компании кои имаат забрана за соработка.
Како што е познато веќе, забраната за соработка со Huawei доаѓа од американските власти кои ја обвинуваат оваа компанија дека соработува со кинеските власти и поради тоа претставува опасност по националната безбедност на САД.
Овие обвинувања секако се негираат од страна на Huawei, а досега немаме видено некој официјален доказ дека тие се точни, со што целата работа останува во рамките на политичката и економска војна помеѓу двете земји.
Доста надежи се ставаат на можната промена на политиката доколку Џо Бајден дефинитивно стане претседател на САД, но за тоа уште нема најави и се верува дека веќе започнатата политика спрема Кина, нема да добие значителни промени, барем на веднаш.