Како што се најавуваше пред претставувањето на iPhone 16 серијата, Apple после настанот се соочи со судска одлука од страна на Европскиот суд на правдата според која од компанијата треба да платат 13 милијарди евра.
Оваа сума се однесува на неплатени даноци од страна на Apple, односно платени многу пониски даноци поради нелегален договор со Ирска за доста ниска стапка на даночење која изнесува од 0,005 до 1%.
Оваа одлука на судот доаѓа по одлуката на Европската Комисија уште во 2016 година која заклучи дека ирската влада им има дадено на Apple нелегална помош, а со тоа им има овозможено и предност во споредба со конкурентите.
Од Apple очекувано не се сложуваат со одлуката и сметаат дека нивните приходи веќе се оданочени во САД и дека ЕУ не може да носи вакви одлуки кои се однесуваат на веќе платени даноци.
Се очекува дека од компанијата ќе ја обжалат одлуката на Европскиот суд на правдата, па ќе видиме дали тоа ќе направи некаква разлика.
