Интеракцијата која корисникот ја има со апликациите од Meta, односно Facebook, Instagram, WhatsApp, па и Threads, се користи за прилагодување на што е тоа што ќе го види на овие апликации.
Со други зборови, алгоритамот на Meta ја зема во предвид содржината која корисникот ја гледа, како објави, слики, видеа, Reels, Stories и слично, содржината која ја „лајкува“, која ја споделува и слично. Дури во предвид се земаат и страните кои корисникот ги отвора.
Сега на оваа листа може да се додадат и разговорите кои корисниците ги прават со Meta AI, како и генералната интеракција со вештачката интелигенција од компанијата.
Во предвид ќе бидат земени текстуални разговори, но и гласовните, па корисниците можат да очекуваат дека темите кои се предмет на разговор, ќе влијаат на содржината која ќе ја гледаат на друштвените мрежи од Meta.
Едноставно кажано, доколку корисникот разговара со Meta AI на тема за планинарење, на пример, може да очекува дека ќе види објави, видеа, слики, Reels и Stories поврзани со планинарење.
Ова секако ќе важи и за рекламите кои ќе им бидат прикажувани на корисниците, односно алгоритамот ќе ги земе во предвид разговорите со ВИ за градење на нивниот профил, односно интереси.
Од Meta најавија дека ќе почнат да ги известуваат корисниците за оваа новина уште од утре, односно 7 октомври, а истата ќе почне да функционира од 16 декември.
На корисниците им остануваат досегашните алатки за прилагодување на што е тоа што го гледаат на овие мрежи, односно содржината и рекламите.
