Елон Маск во текот на денешниот ден ја испрати првата имејл порака до вработените на Twitter преку која им нагласи дека ќе треба да се подготват за тешки времиња кои следат. Во основа тој ги подготвува половината од вработените кои останаа во компанијата за промените кои ќе следат со цел да ја направат компанијата профитабилна, како и да ги воведат планираните новини.
Покрај ова, Маск ги извести вработените дека веќе нема да можат да работат од дома, односно надвор од канцеларијата и ќе мора да доаѓаат минимум 40 часа неделно на работа. За тоа тој истакнува дека нема замена од работата на претпоставените со нивните вработени, а оваа негова филозофија е спроведена и во Tesla и SpaceX.
Една од целите кои ги има истакнато Маск во неговата порака е половина од приходите на Twitter да бидат од месечни претплати. Со ова станува јасно зошто беше направена целата збрка со Twitter Blue и давањето на син беџ на сите кои ја плаќаат по ново 8 долари месечната претплата.
Целта е да што повеќе корисници се претплатат на Twitter Blue, а беџот изгледа е само тука за да мотивира што повеќе корисници да го направат тоа.
Вработените во Twitter веќе со години имаат политика на работа од „било каде“, а тоа посебно дојде до израз со корона кризата кога повеќето компании во светот ја започнаа оваа практика привремено.
Уште една придобивка која вработените ја имале од корона кризата веќе нема да функционира, а тоа се денови за одмор во текот на месецот.
