Автомобилите со можност за автономно возење уште не се нешто стандардно, а секако тука се и законските регулативи кои треба да овозможат такво нешто. Најпознати автомобили кои можат самите да се возат, барем до одреден степен, се Tesla, а не се ретки видеата каде сопствениците претеруваат со довербата во системот.
Автономните возила треба да станат легални во Велика Британија оваа година, па властите во земјата планираат промена и на уште еден закон кој е поврзан со нив. Се работи за закон донесен во 1986 година со кој им се забранува на возачите да гледаат во „телевизиски апарат“ додека возат.
Овој дел од законот ќе се промени за возачите на автономни возила, па тие ќе можат да гледаат телевизија, односно некој филм или серија на нивниот екран додека автомобилот е во автономен режим.
Од Одделот за транспорт посебно истакнуваат дека возачот мора да биде во позиција да веднаш го преземе управувањето на возилото, а возилата треба да имаат можност за прекинување на филмот кога е потребно вниманието на возачот.
Поради оваа причина се истакнува дека со овие промени ќе остане забраната за користење на мобилен телефон додека се вози, а поради неможноста да се исклучи телефонот автоматски кога возачот мора да го насочи вниманието кон патот.