Messenger едно време стана доста сложена апликација, која дури беше наречена и платформа поради големиот број на функции кои ги имаше, меѓу кои и игри. После паметна одлука од страна на Facebook, игрите беа префрлени на главната апликација, а Messenger повторно стана апликација за правење на разговори и ништо повеќе.
Сега од Meta повторно експериментираат со игри во Messenger, а овој пат како дел од видео повиците. Корисниците сега можат да изиграат и по некоја игра додека се на видео повик со нивните пријатели, а достапни се 14 бесплатни игри за почеток.
Од компанијата истакнуваат дека повеќето игри може да се играат со различен број на играчи, но сите можат да бидат играни и само со двајца корисници.
До игрите може да се дојде за време на видео повик и притискање на „group mode“ копчето, како и „Play“. Ова треба да ја отвори листата на игри кои се достапни без потреба од нивно инсталирање.
Бројката на игри засега е мала, но од Meta најавуваат нејзино зголемување. Достапни се игри како Card Wars, Exploding Kittens, Mini Golf FRVR, Words With Friends и слични.
Игрите во видео повиците на Messenger се достапни преку мобилните апликации, како и преку веб.
