io Products, Inc. официјално се спои со OpenAI, а со тоа најавеното купување на оваа компанија е завршено. Како што е познато, io е стартап компанија на познатиот Џони Ајв, а купувањето од страна на OpenAI беше најавено во мај оваа година.
По малите судски проблеми за користењето на името io, официјализирањето на договорот беше објавено од страна на OpenAI, како кратко ажурирање на првата објава.
„Со воодушевување споделуваме дека тимот на io Products, Inc. официјално се спои со OpenAI. Џони Ив и LoveFrom остануваат независни и преземаат длабоки дизајнерски и креативни одговорности во OpenAI.“ – стои во објавата.
Соработката на ова ниво помеѓу човекот кој стои зад дизајнот на повеќето Apple производи и близок соработник на Стив Џобс и OpenAI очекувано привлекува големо внимание. За идната година се најавува претставување на производ кој ќе функционира со вештачка интелигенција, а засега има само претпоставки каков ќе биде тој производ.
Се што се знае во оваа фаза е дека засега не се планира производ кој би имал за цел да ги замени телефоните, а јасно е дека за такво нешто е уште рано.
