Неколку месеци по пуштањето на Copilot за бизнис корисниците, поточно на бизнис пакетите од Microsoft 365, сега генеративната вештачка интелигенција е тука за сите корисници на порано наречениот Office пакет на апликации.
Пристапот до Copilot за приватните корисниците на Microsoft 365 Personal и Family пакетите е овозможен преку новиот Copilot Pro. Се работи за Pro верзија од Copilot која чини 20 долари месечно по корисник, што значи дека сепак е наменета за тие кои навистина им е потребна една ваква алатка.
Copilot Pro ја додава вештачката интелигенција на апликациите Word, Excel, PowerPoint, Outlook и OneNote на PC, Mac и iPad.
За тие кои не се претплатници на двата приватни пакети од Microsoft 365, Copilot Pro сепак доаѓа со корисни функции. Корисниците на Copilot Pro добиваат пристап до најновите технологии од OpenAI и Microsoft, односно до технологиите како GPT-4 Turbo, понапредно креирање на слики со Image Creator, како и најновата можност за креирање на сопствени изменети верзии од Copilot, односно Copilot GPTs.
Microsoft исто така најави дека Copilot сега им е достапен на сите бизнис корисници, односно веќе не е важна големината на компанијата. Тоа значи дека Copilot можат да го додадат претплатниците на сите бизнис пакети, а тргнато е и ограничувањето на бројот на корисници кои треба да се купат од 300 на 1.
Од компанијата не потсетија и на достапноста на Copilot како апликација на Android и iOS, а исто така оваа алатка ќе биде интегрирана и во мобилната апликација Microsoft 365.
