Веќе одреден период се шпекулираше, а денеска Apple ги потврди тие информации испраќајќи покани за настан кој што ќе се одржи на 9-ти Септември. Со оглед дека информациите доаѓаа од доста страни, како и праксата на компанијата од претходните години, немаше сомневање дека настанот навистина ќе се одржи на оваа дата.
Сепак од компанијата не откриваат ништо во поканата, дури овој пат нема ни мал дел кој што треба да асоцира на тоа што ќе биде претставено. Поканата е едноставна и како што можете да видите таа само ја содржи датата на настанот, како и изјавата „Би сакале да можеме да кажеме повеќе“.
На овој настан како што повеќе од вас веќе знаете, се очекува да биде претставена наредната генерација од iPhone телефонот, односно iPhone 6 за кој што се верува дека ќе вклучува поголем екран. Се очекува претставување повторно на два модели, од кои што едниот треба да има 4,7 инчен екран, а другиот 5,5. Според информациите, можно е претставување само на едниот модел, по што во месеците што следат би бил претставен другиот.
Покрај очекувањата за iPhone со поголем екран, нешто што станува се повеќе популарно кај корисниците, се најавува и можноста од Apple да претстават и паметен часовник. Со оглед на фактот што е за тоа веќе одреден период се шпекулира, како и кога ќе се земе популарноста на овие уреди кои што доста од нив ќе бидат претставени во Септември од другите производители, може да се каже дека можноста и Apple тоа да го направи не е мала.
Сепак од компанијата не сакаат да знаеме ништо повеќе во оваа фаза, па останува да видиме што ќе биде претставено за нешто помалку од две недели.
Извор: Engadget, TechCrunch
