Како што очекувавме, по најавата од страна на Грег Џозвиак, Apple денеска ја претстави најновата надградба на нивниот MacBook Pro со 14 инчен екран. Овој лаптоп сега доаѓа со најновиот М5 чип од компанијата, а истиот донесува неколку подобрувања во споредба со М4.
Apple со овој нов чип посебен акцент става на подобрувањата кои ги донесува за работа со вештачка интелигенција, односно машинско учење, големи јазични модели и слично.
Според Apple, MacBook Pro со М5 доаѓа со 3,5 пати подобри перформанси за ВИ, заедно со 1,6 пати подобри перформанси кај графичкиот процесор. Графичкиот процесор, кој доаѓа со 10 јадра, доаѓа со „Neural Accelerator“, со што се постигнува и најавеното подобрување кај перформансите за ВИ во споредба со М4 чипот.
Ова подобрување кога ќе се спореди со М1 чипот, изнесува дури 6 пати подобри перформанси за корисниците кои дури сега ќе се решат за купување на нов лаптоп.
Процесорот кај М5 донесува 20% подобрување на перформансите во споредба со М4, а тука е и процесорот за вештачка интелигенција со 16 јадра, како и секогаш.
Овој нов чип кај MacBook Pro донесува и побрза меморија, што дополнително влијае на перформансите, а тука е и побрзиот SSD диск.
Apple за 14 инчниот MacBook Pro со М5 најавува и подобро траење на батеријата, па истата треба да издржи до 24 часа работа, а лаптопите од компанијата се познати по издржливоста дури и со посериозна работа.
