Nothing го претстави нивниот трет паметен часовник под брендот CMF, кој е бренд претставен од компанијата во 2023, иако и главниот бренд е прилично нов. Под CMF се претставуваат уште поевтини производи кои се препознатливи по уникатниот дизајн карактеристичен за Nothing.
CMF Watch 3 Pro го продолжува интересниот стил на компанијата со изглед кој потсетува на класичен часовник и со портокалово ремче како боите на брендот.
Како и за сите паметни часовници, се истакнуваат можностите за мерење на работи како пулс, спиење, кислород во крвта, чекори, како и повеќе видови на вежби.
CMF Watch 3 Pro доаѓа со 1,43 инчен AMOLED екран со резолуција од 466 на 466 пиксели со што се добива нивна густина од 326 пиксели на инч, како и стапка на освежување до 60 херци.
Батеријата е со капацитет од 350 mAh, а се полни за 99 минути, но тука доаѓа до израз видот на часовник со траењето на батеријата според Nothing.
Од компанијата истакнуваат дека CMF Watch 3 Pro може да издржи до 13 денови нормално користење, односно 10 со поактивно користење, додека таа бројка паѓа на 4,5 денови доколку корисникот активно го користи часовник и го вклучи „always on“ екранот.
Од Nothing посебно ја истакнуваат нивната Nothing X апликација за прилагодување на часовникот, а од тоа што може да се види, истата овозможува доста голема „персонализација“, типично за компанијата.
Овој часовник има цена од околу 115 евра.
