Доколку сте љубители на Star Trek сериите и филмовите, овој уред веднаш ќе ве потсети на познатиот трикодер кој што се користи, а посебно во оригиналната, односно првата серија од седумдесеттите. Во таа серија луѓето користејќи мал уред го скенираат составот на скоро се што им е потребно, а резултатите од скенирањето ги читаат на друг уред со големина на мобилен телефон само многу подебел.
SCiO е мал уред кој што се користи за скенирање на хемискиот состав на одредени производи, а резултатите ги прикажува на паметните телефони преку Bluetooth конекција. Се разбира овој уред е далеку од тоа што го гледате на филмовите и сериите, меѓутоа може да се каже дека го најавува почетокот и развојот на ваков тип на уреди. SCiO не е првиот уред од ваков тип, меѓутоа повеќето се користат во лабораториите и се многу поголеми и се разбира поскапи. Во оваа фаза на развој уредот може да го прикаже хемискиот состав на храната, лековите, растенијата, а со тек на време и развојот се планира проширување на повеќе работи како, козметика, облека, почва, накит, кожа, гума, масла, пластика и други. За можноста од филмовите за скенирање на составот на крвта и повеќе информации за човечкото здравје изгледа ќе треба да почекаме нешто повеќе.
SCiO сензорот претставува мал преносен спектрометар кој што информациите ги добива користејќи ја методата на near-IR spectroscopy, односно спектроскопија на регионот близок до инфрацрвената светлина од електромагнетниот спектар. Објаснето на поедноставен начин, секоја молекула вибрира на свој уникатен начин, а тие вибрации вршат интеракција со светлината создавајќи нивни уникатен оптички потпис. SCiO сензорот вклучува извор на светлина кој што го осветлува примерокот кој што го скенирате и оптички сензор наречен спектрометар кој што ја собира одбиената светлина. Спектрометарот ја разложува светлината до нејзиниот спектар со што ја добива потребната информација за молекулите на скенираната работа.
Информациите од светлината ги испраќа на поврзаниот паметен телефон преку Bluetooth конекцијата, по што преку интернет се поврзува до соодветниот сервис каде што преку алгоритми се врши анализа на спектарот и се враќа информација за составот на скенираниот објект.
SCiO моментално е во фаза на прибирање на средства преку Kickstarter и има собрано скоро 5 пати повеќе од потребните 200.000 долари потребни за почетокот на производство. Почетната цена изнесуваше 150 долари, а сега е зголемена на 200. Се очекува да биде доставен на поддржувачите од почетокот на идната година.
Апликациите кои што работат со уредот се достапни за корисниците на iOS и Android паметни телефони.
