Џек Дорси, кој е најпознат како ко-основач и поранешен директор на Twitter, претстави апликација за разговори која не користи интернет, а функционира само преку Bluetooth „меш“ мрежа.
Името на апликацијата е bitchat, а моментално е во тест, односно бета фаза, а ќе видиме дали и колку ќе продолжи развојот и популарноста кај корисниците.
Оваа апликација веднаш е јасно дека не е замислена да биде конкуренција или замена за било кој од популарните апликации за разговори. Апликација како bitchat би била доста корисна во ситуации кога не е достапна мобилна мрежа, како при природни непогоди, како и во ситуации кога мрежата е оптоварена, како на концерти, протести и слично.
bitchat доаѓа со од-крај-до-крај шифрирање на комуникацијата, нешто без кое не би имала голема вредност, како и можност за комуникација со корисници кои се нешто подалеку преку „посредници“, односно други корисници на апликацијата на истата локација.
