Иако со нетрпение очекуван од корисниците кои сакаат да користат нови и различни уреди, а посебно од страна на фановите на Microsoft, сепак Surface Duo не успеа да привлече поголемо внимание. Оценките во главно беа одлични за изработката, а посебно за тоа колку се тенки двата дела од уредот на преклопување, но генерално функционалноста на уредот не беше нешто посебна.
Вакво нешто е и очекувано за прва генерација од нов производ, иако Microsoft не мораше да се одлучи да стави застарени компоненти и една камера.
Ова изгледа нема да ги предомисли од компанијата да претстават и втора генерација, која според неофицијалните информации се очекува за оваа есен. Според овие информации Surface Duo 2 ќе дојде со моментално најдобрите компоненти овој пат, а тоа значи дека може да се очекува Snapdragon 888, повеќе RAM, а исто така и три камери поставени во сега модерниот стил кај конкурентите, со поголем и забележлив модул.
Трите камери се очекува дека ќе бидат како што би се очекувало, односно една стандардна, една со широк агол и една за зумирање.
Заедно со информациите, достапни се и првите неофицијални слики од Surface Duo 2 кој оваа година ќе дојде и во црна боја, за разлика од само белата која повторно ќе биде достапна.