MediaTek ја претстави третата генерација од нивните „All Big Core CPU“ чипови, Dimensity 9500. Почнувајќи од Dimensity 9300, од компанијата започнаа со ставање поголем акцент на перформансите од нивните чипови, а со тоа може да се каже дека станаа трет сериозен играч на пазарот.
Dimensity 9500 доаѓа со главно процесорско јадро, ARM C1-Ultra, кое функционира до 4,21 GHz, заедно со уште три C1-Premium јадра, како и уште четири C1-Pro јадра. Овој осумјадрен процесор треба да овозможи сериозни перформанси, а ќе ги видиме и тестовите кои ќе излезат после претставувањето на телефони со овој чип. Како први кои ќе работат на Dimensity 9500 се телефони од Oppo и Vivo, кои ќе бидат претставени до крајот на годината.
MediaTek најавува подобрување на перформансите до 32% кога се мери едно јадро, односно до 17% кога се мерат повеќе јадра во споредба со претходната верзија. Главното јадро треба да донесе до 55% помала потрошувачка на енергија.
Чипот донесува и нова архитектура за „кеш“ и меморија, како и поддршка за 4 канален UFS4.1, со што се најавува подобрување на брзината на читање и впишување на податоци, како и работа со големи јазични модели за 40%.
Јасно е дека голем дел од подобрувањата ќе бидат насочени и кон работата на вештачката интелигенција, а посебно се истакнуваат и графичките способности со ARM G1-Ultra графичкиот процесор кој треба да донесе можност за играње на игри со доста подобри карактеристики.
Целата објава од MediaTek и деталите околу Dimensity 9500 се достапни тука.
