Spotify најави нова и интересна функција за своите Premium претплатници која за почеток е со бета ознака. Истата доаѓа под името и новото копче „Mix“, а во основа на корисниците ќе им овозможи да бидат диџеи и да ги направат поинтересни нивните листи со музика.
Како што може да се заклучи и од самото име, Mix на корисниците ќе им овозможи да додадат посебни преоди помеѓу песните во нивните листи, а покрај можноста истото да биде направено автоматски, корисниците ќе можат самите да изберат кога и како ќе биде направен преодот.
За истото корисниците ќе можат да направат промена на звукот, „еквијалзерот“, ефекти и слично, а најкорисна ќе биде можноста визуелно да се видат нивоата за уште попрецизно правење на преодот.
Mix функцијата е достапна преку новото копче во самите листи со музика, а корисниците ќе можат да ги вклучуваат и исклучуваат направените преоди.
Покрај ова, овие листи со музика ќе можат да се споделат со други корисници, со кои ќе можат и заедно да работат на подобрување и измена на направените преоди.
