Пред повеќе од една година, Microsoft најави дека сите Lumia телефони ќе можат да бидат надградени на новиот Windows 10 Mobile, дури и оние постарите со послаби процесори, само 512 MB рам и 4 GB внатрешен простор. Сепак, искуството покажа дека новиот оперативен систем не работи најдобро со овие компоненти и затоа Microsoft ја покачи границата на минимум 1 GB рам и 8 GB внатрешен простор.
Ова значи дека производителите кои отсега ќе сакаат да произведуваат Windows 10 Mobile паметни телефони, ќе мора да вградат минимум такви спецификации во своите паметни телефони. Исто така, ова значи дека сите кои имаат постари Lumia телефони, како на пример популарната 520-ка, дефинитивно нема да можат да го надградат својот уред на Windows 10 Mobile, а отсега веројатно нема ни да добиваат нови “Insider” верзии.
Бидејќи и јас лично сум Windows 10 Mobile, а претходно и Windows Phone корисник на неколку различни уреди, можам да потврдам дека новата надградба на Windows 10 не работи најдобро на телефони со 512 MB рам – често се случува да „крашнуваат“ апликациите, а и целосно, оперативниот систем работи прилично забавено.
Затоа, за оние на кои не им се допаѓа одлуката на Microsoft да не го направи достапен Windows 10 Mobile на овие телефони, не очајувајте бидејќи таа би направила вашиот уред да работи многу полошо од претходно.
Извор: Windows Central, MS Power User, Softpedia
