“Internet of things” се сите оние нови паметни уреди кои во иднината ќе ги имаме во нашите домови, како на пример паметни термостати за клима уредите, но и многу други мини компјутери, електронски уреди, сензори и сл. кои можат да бидат мрежно поврзани на интернет мрежата. Како што вети, Microsoft го лансираше новиот Windows 10 и за таквите уреди, кој е помала и полесна верзија од оној што ќе се вградува во компјутерите, Xbox и мобилните уреди.
Затоа, не очекувајте дека овој Windows 10 ќе го има истиот интерфејс како неодамна претставената верзија за компјутерите. Во превод, нема десктоп и нема работење со апликации отворени во повеќе прозорци одеднаш. Тука, самата апликација која ќе биде наменета за тој уред, ќе биде всушност во исто време и кориснички интерфејс. Бидејќи, на кого би му требал десктоп на еден термостат, нели?
Windows 10 за IoT ќе може да прифати апликации програмирани во скоро сите познати “open source” програмски јазици, а ќе ја користи и универзалната платформа на Windows 10, односно можноста да користи апликации од мобилните и компјутерските верзии на оперативниот систем.
Засега, Windows 10 за IoT работи на мини компјутерите Raspberry Pi 2 и Minnowboard Max и може да функционира и без дисплеј, нормално ако вградената апликација има таква можност. За разлика од бета верзиите, Windows 10 сега целосно функционира на овие два компјутери, со Wi-Fi и Bluetooth поврзување.
Сите програмери и развивачи на апликации сега можат да креираат и софтвер за Windows 10 IoT, а ќе им треба само Windows 10 оперативен систем и Visual Studio 2015, како и IoT Core, кој може да биде симнат од тука.
Извор: Venture Beat, The Next Web
