Во најновата тест верзија за Dev каналот од Windows Insider програмата, односно верзијата 26220.6690, Microsoft тестира можност за споделување на прозорот од отворените апликации во Copilot.
Со ова корисниците ќе можат да ја искористат Copilot Vision функцијата, односно да добијат повеќе информации за тоа што се прикажува на екранот, како и да го продолжат разговорот со Copilot.
Оваа новина вклучува додавање на ново „Share with Copilot“ копче на малата слика од отворениот прозор која се прикажува кога ќе се помине со курсорот врз иконата од таа апликација на долната лента.
Можеби оваа новина за некои корисници ќе биде корисна, но останува фактот дека истата е направена баш во типичниот стил на Microsoft.
Уште од самиот почеток на Copilot, од компанијата ја додаваат вештачката интелигенција во сите нивни производи, каде и да стигнат, па еве сега можно е да имаме уште еден начин како да стигнеме до овие алатки.
Од компанијата дури планираат автоматски да ја инсталираат Microsoft 365 Copilot апликацијата за корисниците на Word, Excel и другите.
Со оглед на тоа што оваа новина е дел од Dev каналот, сепак не можеме да знаеме дали ќе биде додадена за сите корисници.
