На вечера организирана од страна на главниот технички директор на Microsoft Azure, Марк Русинович, присуствуваа и за првпат се сретнаа две личности за кои обично се смета дека не би сакале да разговараат.
Работата не е толку драматична како што се претставува, но дефинитивно е интересна средбата која се случува за првпат помеѓу Бил Гејтс и Лајнус Торвалдс.
Причината поради која оваа средба привлекува внимание може да се каже дека повеќе е поврзана со Торвалдс, човекот кој стои зад развојот на Linux Kernel-от и кој нема штедено зборови при критикувањето на Microsoft и Windows.
Критики доаѓаа и од страна на Microsoft, а посебно во времето на Стив Балмер, нешто што сепак на крајот беше променето како став, посебно по приклучувањето на Microsoft кон The Linux Foundation и придонесувањето во одредени проекти со отворен код.
Информацијата за средбата помеѓу Гејтс и Торвалдс кратко беше пренесена преку LinkedInn профилот на Русинович, кој истакна дека Лајнус никогаш го немал запознаено Бил и дека не биле донесени некои големи одлуки поврзани со „кернел“.
На вечерата присутен бил и Дејвид Катлер, човекот којшто стои зад развојот на „кернелот“ на поновите верзии од Windows, односно Windows NT, верзии кои веќе не беа направени на основа на MS-DOS.
