Скопје, 26. август, 2025 – Samsung Electronics Co., Ltd ја проширува својата услуга за далечинско управување со домашни апарати (HRM) на глобално ниво, со што го подобрува искуството за далечинска дијагностика и решавање проблеми за корисниците на паметни апарати ширум светот. Услугата е веќе активна во 122 земји со поддршка на 17 јазици, овозможувајќи беспрекорна поддршка за широката глобална корисничка база.
HRM е услуга што ги поврзува апаратите приклучени на SmartThings со сервисната мрежа на Samsung, одржувајќи континуиран запис за состојбата на уредите и овозможувајќи следење во реално време преку сервисниот центар. Со согласност од корисникот, советниците во сервисните центри можат далечински да пристапат до дијагностички податоци – вклучувајќи ја внатрешната температура на фрижидерите, нивото на влажност во сушарите или перформансите на ладењето кај клима-уредите и да понудат решенија или насоки за надминување на проблемите.
HRM се користи за далечинска поддршка на корисници од 2020 година во Кореја, а во 2024 година беше пилотирана во 10 земји. Оваа година, услугата официјално е лансирана на глобално ниво во 122 земји, со поддршка за фрижидери и машини за перење. За да се овозможи успешното глобално проширување, Samsung ја зголеми јазичната поддршка на HRM од англиски и корејски на вкупно 17 јазици – вклучувајќи шпански, португалски, германски, француски, руски и чешки.
„Услугата HRM на Samsung е пример за нашата посветеност кон проактивна и интелигентна грижа за корисниците,“ изјави Мијонг Ју, извршен потпретседател и раководител на глобалниот тим за задоволство на корисници во бизнисот со дигитални апарати (DA) на Samsung Electronics. „Благодарение на комбинацијата на беспрекорно поврзување и увид во реално време, оваа услуга им помага на нашите корисници да ја намалат комплексноста, со што во крајна линија се подобрува нивното целокупно задоволство“.
Подобрување на услугата за апарати со екрани
Во согласност со проширувањето на апаратите со екрани, како што се Bespoke фрижидерите и машините за перење, Samsung воведе и функција за споделување на екранот за унапредување на дијагностичките можности. Кај различни екрани од 7 инчи, 9 инчи и Family Hub, корисниците можат во реално време да го споделат екранот на својот уред со советниците од сервисните центри, овозможувајќи дијагностицирање на проблеми поврзани со екранот, нефункционирање на апликации или проблеми при репродукција на мултимедија. Оваа функција првично беше воведена во 2021 година со Family Hub фрижидерите, а потоа се прошири на фрижидерите со 9 инчен екран во јули 2025 година, со тоа што поддршката за машини за перење со 7-инчен екран ќе биде достапна од септември⁴.
Итни решенија и намалени посети на сервис поради далечинска асистенција
Услугата HRM на Samsung ја подобрува ефикасноста на корисничката поддршка овозможувајќи решенија во реално време за едноставни проблеми со производите кои претходно бараа посета на техничар во домот. На пример, кај корисник кој пријавил дека копчињата на машината за перење не реагираат, советникот преку HRM системот дијагностицирал дека е активирана функцијата „Заклучување за деца“ (Child Lock). Со едноставна насока за тоа како да се деактивира поставката, проблемот бил веднаш решен без потреба од посета на техничар. Во друг случај, кога корисник пријавил кондензација на вратата од фрижидерот, со согласност на корисникот, советникот успеал далечински да го вклучи внатрешниот грејач, со што влагата била ефикасно елиминирана.
Сепак, кога е неопходна посета на лице место, HRM го подобрува искуството со тоа што им овозможува на техничарите однапред да ги прегледаат деталните дијагностички податоци. Така тие можат да пристигнат на локацијата подготвени со соодветни делови и алати, со што се намалуваат повторените посети и значително се скратува времето за поправка. Ова го прави HRM особено ефикасен во големи земји и тешко достапни региони, каде традиционалните посети на техничари може да се соочат со доцнења.
Во региони како САД и Индија, HRM се користи и проактивно за справување со можни дефекти на уредите пред тие да ескалираат⁵. Во САД, уредите поврзани преку SmartThings се активно следени за различни потенцијални ризици. Кога ќе се открие ризик, корисниците веднаш се информираат преку SmartThings push известувања, што им овозможува навремено да реагираат. Слично, во Индија, сервисниот центар активно ги следи апаратите поврзани на SmartThings, идентификувајќи можни ризици и контактирајќи ги корисниците за да ја разгледаат ситуацијата. Кога е потребно, се испраќа сервисен инженер за темелни инспекции или замена на делови, со што се обезбедува навремено и ефикасно решавање на проблемите и спречување на појавата на поголеми дефекти.
Се поголемо прифаќање и задоволство на корисниците
Користењето на HRM системот постојано расте, со значителен пораст на стапката на употреба што се припишува на подобрената јазична поддршка во различните региони каде што е достапен. Во јули 2025 година, бројот на дојдовни сервисни повици на глобално ниво што го користеле HRM се удвои во споредба со јануари истата година. Во Франција, стапката на употреба на HRM за апаратите каде што е применлив порасна за повеќе од 30 процентни поени оваа година, по воведувањето на поддршката на француски јазик. Ова е во контраст со претходната година кога системот беше во пилот фаза со англиски јазик, што ја нагласува важноста на јазичната достапност за прифаќањето на системот.
Задоволството на корисниците исто така се подобрува. Во Индија, каде што стапката на користење на HRM за сервисни повици е повисока од другите региони, резултатот за задоволство на корисниците за далечински сервисни повици се подобри за повеќе од 10 процентни поени во вториот квартал од 2025 година во споредба со претходната година. Клучни области на подобрување беа решавањето на проблемите и професионалноста покажана за време на повиците, што придонесе за севкупното подобрување на корисничкото искуство.
Со континуираното проширување на решенијата за поддршка на корисници како HRM, Samsung реализира поудобни и поефикасни начини за грижа за домашните апарати – намалувајќи го времето на застој, подобрувајќи го корисничкото искуство и поставувајќи нови стандарди за глобалната услуга. Како што HRM достигнува повеќе земји, јазици и категории на производи, Samsung останува посветен на обезбедување попаметна и поинтегрирана грижа за домовите на иднината.
