Елон Маск, основачот и главен директор на Tesla, ги има стопирано сите нови вработувања во компанијата, а побарал и намалување на постојните вработени за 10%
Како причина за оваа одлука е „супер лошото чувство“ кое тој го има за економијата во периодот што следи, а веќе ги гледаме првите проблеми со рекордно висока инфлација кај повеќето земји во светот.
Оваа одлука Маск ја има соопштено на директорите во Tesla преку внатрешна порака, до која имаат дојдено од Reuters.
Според официјалните информации, Tesla во светот вработува околу 100.000 луѓе, а според Маск тоа веќе претставува превработеност во одредени делови од компанијата.
Неколку денови пред оваа одлука, Маск побарал враќање на сите вработени во канцелариите и исполнување на стандардните 40 часа во неделата. Ова, како што можевме да видиме во повеќе други компании во САД, не било баш добро прифатено, а Маск доби и критики од неколку директори на други компании кои сметаат дека веќе нема потреба сите да работат од канцеларија.
Дали оваа одлука на Маск е добра во ова време на криза и дали ќе предизвика уште поголема криза, ќе видиме во периодот што следи. Предвидувања од луѓе како Маск за лошата иднина на економијата не можат да донесат ништо добро.