Во текот на изминатиот викенд, повеќе од 30 деца и млади од целата земја се собраа во Скопје на дводневен медијатон – интензивен настан што го водеа самите млади за дизајнирање национална кампања против онлајн насилството и говорот на омраза на интернет.
Овој настан го организираа УНИЦЕФ и Фондацијата Телеком за Македонија како дел од долгорочното партнерство за децата и младите да се здобијат со знаење, алатки, содржини и лидерски вештини за справување со дигиталното насилство во нивните заедници.
Претставничката на УНИЦЕФ, Лесли Милер, им се обрати на учесниците: „Вие – нашите млади застапници и креатори – сте срцето на ова движење. Вие го разбирате онлајн просторот подобро од кој било друг. Токму затоа не сте само учесници во оваа иницијатива, туку сте нејзини лидери“.
Таа додаде дека ставањето крај на онлајн насилството не е еднократен проект – тоа е растечко движење водено од деца и млади решени да ги направат дигиталните простори побезбедни, поинклузивни и похумани за сите.
Леа Липша, директорка на Фондацијата Телеком за Македонија ги охрабри учесниците креативно да ги користат дигиталните алатки и заедно да се спротивстават на омразата на интернет. „Верувам дека на оваа работилница освен што ќе научите да направите добар reel, лого, или слоган, ќе научите и дека најважно е да се поддржувате, да создавате креативни и позитивни онлајн заедници. Вие сте генерација што има можност да направи вистинска разлика во дигиталниот свет. А ние сме тука да ви дадеме алатки и поттик“ – рече Леа Липша.
Во текот на Медијатонот, преку тимска работа, учесниците заедно со креативни професионалци, психолози и дигитални ментори истражуваа што значи да се преземат активности онлајн: како да се пријави насилство, како да се блокира омразата, како да се поддржат врсниците и како да го заштитат својот дигитален идентитет. Работилниците беа фокусирани на осмислување материјали за кампањата и јасни повици за акција, за да се промовира култура на почит во онлајн просторот и за да им се помогне на децата и младите да се здобијат со знаење како да се спротивстават на омразата.
Кампањата ќе започне во текот на следните недели со материјали подготвени за време на медијатонот и ќе содржи видеа, водичи и содржина за социјалните мрежи. Децата и младите кои учествуваа на работилницата ќе продолжат да работат во следните две години како застапници во нивните заедници заедно со Сојузот на извидници на Македонија, кој ќе организира младински каравани и интерактивни настани во 20 општини, инспирирајќи ги другите да се приклучат на движењето.
Иницијативата е дел од двегодишното партнерство помеѓу УНИЦЕФ и Фондацијата Телеком за Македонија чија цел е да се создаде движење преку кое децата и младите ќе се борат за интернет без врсничко насилство и говор на омраза.
