Play Store започнува со добивање на нова можност со која корисниците ќе можат да изберат да после секое инсталирање на нова апликација, истата автоматски биде отворена после пет секунди.
Оваа можност ќе биде достапна под копчето за инсталација, што значи дека корисниците ќе имаат избор дали сакаат да ја користат. Стандардно можноста нема да биде вклучена, па нема да има ситуација каде корисниците ќе се чудат што се случува.
По инсталацијата на апликацијата ќе се прикаже дел кој ќе одбројува до вклучувањето на апликацијата, по што истата автоматски ќе се вклучи.
Не е баш позната логиката зад оваа нова можност, а посебно што корисниците веќе имаат можност веднаш да ја вклучат апликацијата преку Play Store после инсталацијата.
Која е предноста на оваа новина, а посебно што истата и треба пет секунди пред да се активира, не ми е јасно.
Една од можностите е тоа што Google не сака корисниците да инсталираат некоја апликација и истата да не ја вклучат. Android ги известува овие корисници кога нема да ја вклучат ново инсталираната апликација после 24 часа од инсталирањето, па можеби автоматското вклучување е поврзано со ова.
Како и секогаш, новините се пуштаат постепено, па во неделите и месеците што следат ќе биде достапна оваа новина кај сите корисници. Истата се тестираше изминатите месеци и беше неофицијално откриена пред официјалното додавање во Play Store.
